ئیدیعای دۆنالد ترامپ، سەرۆکی ویلایەتە یەکگرتووەکانی ئەمریکا کە ٦٠ ملیۆن دۆلار هاوکاری بۆ غەززە نێردراوە، لەلایەن ڕۆژنامەی واشنتۆن پۆستەوە ڕەتکراوەتەوە و ڕاگەیەندرا لە ڕاستیدا تەنها ٣ ملیۆن دۆلار نێردراوە.

ئیدیعای دۆنالد ترامپ سەرۆکی ئەمریکا کە ٦٠ ملیۆن دۆلار هاوکاری بۆ غەززە کراوە، لەلایەن میدیاکانی ئەمریکاوە خرایە ژێر پرسیارەوە. ڕۆژنامەی واشنتۆن پۆست بە پشتبەستن بە سەرچاوەکانی وەزارەتی دەرەوەی ئەمریکا ڕایگەیاند کە ئەم بڕە پارەیە دوورە لە ڕاستییەوە.

بەگوێرەی ئەو ڕۆژنامەیە، لە چەند هەفتەی ڕابردوودا تەنیا ٣ ملیۆن دۆلار بۆ دەزگای فریاگوزاری مرۆیی غەززە گواستراوەتەوە. ڕاپۆرتەکە بە پشتبەستن بە لێدوانەکانی وەزارەتی دەرەوە جەختی لەوە کردووەتەوە کە لێدوانەکەی ترامپ کە دەڵێت "٦٠ ملیۆن دۆلار نێردراوە" هەڵە بووە، وەزارەت پێشتر دووجار ئەم ژمارەیەی ڕاستکردۆتەوە بۆ "٣٠ ملیۆن دۆلاری تەرخانکراو".

بەڵام باس لەوە کرا کە تەنیا لە سەدا ١٠ی ئەم ٣٠ ملیۆن دۆلارە، واتە ٣ ملیۆن دۆلار گەیشتووەتە غەززە. هیچ زانیارییەکی ڕوون لەسەر چۆنیەتی بەکارهێنانی ئەو بەشەی کە دەمێنێتەوە بڵاو نەکرایەوە.

لە زنجیرەیەک لێدوانی هەفتەی ڕابردوودا ترامپ ڕایگەیاند، “٦٠ ملیۆن دۆلار هاوکاری خۆراکمان بۆ غەززە ناردووە، بەڵام کەس ناڵێت سوپاس." بەڵام ئەوە ڕوون بووەتەوە کە ئەم لێدوانە لەگەڵ داتا فەرمییەکان ناگونجێت.

ڕاپۆرتەکەی واشنتۆن پۆست پرسیارەکانی سەبارەت بە شەفافیەتی سیاسەتی هاوکارییەکان لە نێو خەڵکی ئەمریکادا زیندوو کردەوە، هاوکات ڕێکخراوە نێودەوڵەتییەکانی فریاگوزاری داوا دەکەن پرۆسەکە بە شێوەیەکی ئاشکراتر بەڕێوەبچێت.(İLKHA)